Hai lugares que gardan moito máis do que vemos a primeira ollada. A Pousada da Boiería, situada en Esgrade, no concello de Baleira, é un deses espazos nos que a historia permanece presente nos seus recunchos, nos obxectos que conserva e nas lembranzas dunha forma de vida doutras épocas.
A visita a esta singular pousada museo permite achegarse a un patrimonio que merece ser coñecido e preservado. Da man dunha persoa que coñece a súa historia, os visitantes poden percorrer os seus espazos, descubrir obxectos singulares e coñecer as historias que se agochan detrás deles.
Non se trata simplemente de contemplar pezas antigas, senón de comprender como se vivía, como se traballaba e como eran os costumes doutras xeracións. Unha oportunidade para recuperar pequenas historias que forman parte da memoria colectiva destas terras.
A experiencia complétase cunha degustación de produtos do Club de Cociña Ancares–Terras de Burón, achegando tamén o patrimonio gastronómico á visita. E para quen queira continuar descubrindo a contorna, a proposta pode combinarse cun paseo ata a próxima Fervenza Pozo da Ferrería, un recuncho natural no que a auga e a vexetación crean un espazo perfecto para gozar da tranquilidade da paisaxe.
Unha visita que une memoria, tradición, gastronomía e natureza. Porque coñecer Ancares–Terras de Burón tamén significa achegarse ás historias que gardan as súas casas e ás persoas que se esforzan por mantelas vivas.



