Cando visites o noso territorio, déixate guiar polos establecementos certificados co selo ‘Cociña de Ancares Terras de Burón’. O emprego de produtos de calidade e a posta en valor do sabor da tradición, son as máximas da rede de pequenos negocios que pertencen a este clube e que podes atopar por todo o noso territorio.

Partindo dunha excelente materia prima, ofrecemos unha proposta gastronómica con experiencias que te achegan á esencia da montaña lucense. Non só poderás saborear deliciosos pratos elaborados con produtos locais, senón que tamén poderás visitar os lugares de onde proceden os ingredientes que se empregan: as campas onde se crían as nosas vacas e tenreiros, os apiarios e cortíns, os obradoiros nos que se elabora cervexa e embutidos, os viñedos e adegas… e por suposto, poderás desfrutar das nosas paisaxes e do noso patrimonio natural e cultural.