Queremos que descubras unha vía alternativa ao Camiño Francés que che permitirá coñecer a fondo boa parte do Xeodestino Ancares Terras de Burón.
Trátase da Vía Künig, unha ruta creada e documentada polo monxe alemán Hermman Künig a finais do século XV e que avanza polo noso territorio a través dos concellos de Pedrafita do Cebreiro, As Nogais, Becerreá e Baralla, o que permite coñecer a fondo a Reserva da Biosfera dos Ancares Lugeses e os Montes de Cervantes, Navia e Becerreá.
Duración aproximada: 1 día.
Déixate marabillar…
… descubrindo unha vía alternativa do Camiño de Santiago que distintas administracións e colectivos están intentando que se convirta nunha ruta oficial para os peregrinos que van á capital compostelá. Moitos son os que xa escollen esta variante trazada polo monxe alemán Hermman Künig pola súa maior tranquilidade, ao non estar tan masificada como o Camiño Francés. No noso caso imos facela en coche, o que nos levará unha xornada, facendo paradas nos puntos máis destacados que atravesa.
O punto de partida en Galicia desta Vía Künig é a aldea do Cebreiro, onde poderemos contemplar as típicas pallozas. De ahí seguiremos a ruta ata Pedrafita do Cebreiro, onde se atopa unha estatua dedicada ao propio monxe. Xa nas Nogais chegaremos á Torre de Doncos, que é o que queda en pé dun castelo medieval que recibía o nome de Fortaleza de Santo Agostiño ou Fortaleza da Grupa.
A seguinte parada será no veciño concello de Becerreá, onde atoparemos varios puntos de interese. O primeiro e a antiga ponte de Cruzul, en plena estrada N-VI. Nela tivo lugar no ano 1809 a Batalla de Cruzul, entre os ingleses e os franceses durante a Guerra da Independencia. Foi construído entre os anos 1776 e 1778 e pertencía ao Camiño Real de acceso a Galicia deseñado durante o reinado de Carlos III co obxectivo de unir Madrid con Lugo, A Coruña e Ferrol.
Moi preto da ponte atopamos o poste miriamétrico de Agüeira, un recordo do que foron as antigas estradas españolas. É un dos poucos postes destas características que se conservan en Galicia, está situado na marxe esquerda da antiga N-VI e é posible que sexa do ano 1861.
O Aciñeiral de Cruzul e o Bosque dos Grobos
Nas inmediacións, na aldea de Cruzul, parte un roteiro de sendeirismo moi ben sinalizado con paneis informativos que concentra unha grande diversidade de especies vexetais e animais.
Os Grobos, un bosque de conto
E sen alonxarse moito está o acceso ao Bosque dos Grobos, un labirinto de rochas kársticas cun colorido de contrastes moi especial propiciado polo xogo de luces e sombras que penetran polos poucos pasadizos existentes e pola densidade dunha vexetación que confire ao espazo un aura de maxia.
Becerreá e Baralla
A Vía Künig abandona o xeodestino tras pasar por Becerreá e Baralla, dous municipios cun rico patrimonio arquitectónico, con distintos pazos e pontes medievais e románicas, así como eclesiástico, onde destacan templos como o mosteiro becerrense de Santa María de Penamaior. Situado no camiño que fixo o monxe alemán, practicamente no límite entre os dous municipios, existen referencias de que xa estaba en pé no ano 922, aínda que a igrexa é algo posterior, cara o 1177. Ten planta basilical, con tres naves e outras tantas ábsidas.
Así mesmo, o casco antigo de Becerreá conserva o encanto dos pobos de montaña coas súas casas de pedra, rúas estreitas e as súas prazas. Convida a dar un paseo mentres desfrutas da visión dos edificios históricos como a antiga casa consistorial, a igrexa de Santa María, o castelo ou a casa dos Condes de Grajal.
Fin de etapa e descanso para autocaravanistas
Se escolliche viaxar en autocaravana, unha vez finalizada a ruta, a área recreativa e de autocaravanas de Baralla é a mellor opción para descansar, xa que, segundo os usuarios e os foros especializados, é o mellor espazo recreativo de Galicia dedicado ao autocaravanismo.
