Desde o Xeodestino Ancares – Terras de Burón formamos parte do Grupo Operativo ‘Gayas – Comida de origen, desde la aldea a casa’, un proxecto innovador que engloba a organismos e produtores da montaña de Lugo e do suroccidente asturiano e que busca colaborar na revitalización destas dúas zonas rurais a través do apoio a distintas iniciativas emprendedoras. O grupo ten a vocación de aproveitar as sinerxias e establecer estratexias e canles de comercialización conxuntas.

A nosa implicación como ente turístico é a de fomentar que as persoas que visitan o territorio coñezan a gastronomía, os produtores locais e saiban de primeira man onde se producen eses alimentos, incluso participando en experiencias turísticas nas propias granxas e zonas de cultivo. Por outra parte, as plataformas online onde se comercializan os pratos cociñados de Gayas son o escaparate perfecto para que a xente que compra nelas coñeza as paisaxes e os recursos turísticos do territorio no que se elaboran e producen estes alimentos.

Cofinanciada pola Unión Europea a través do Fondo Europeo de Desenvolvemento Rural (FEDER) e a Dirección Xeral de Desenvolvemento Rural, Innovación e Formación Agroalimentaria (DGDRIFA), esta plataforma supraautonómica conta na actualidade con sete membros. Xunto ao noso Xeodestino agrúpanse a Asociación de Gandeiros da Fonsagrada (Asgafon); a cooperativa A Carqueixa, de Cervantes, coa súa exquisita carne; Eiroas Ibias, de San Antolín de Ibias, cos seus embutidos de porco; o mel de Outurelos – El País del Abeyeiro, que xestiona Alberto Uría en Negueira de Muñiz; a Queixería Casa Páxaro de Tormaleo (Ibias), con Yolanda Álvarez á cabeza; e por último a Universidade de Santiago de Compostela a través do seu grupo de economía agroalimentaria e medioambiental Ecoagrasoc.

Un rural vivo e con posibilidades

Un dos obxectivos principais deste proxecto é achegar os produtos típicos da zona a toda a península, apostando por un rural vivo, onde aínda se producen alimentos de calidade e poñendo en valor os distintos produtos de tempada. En definitiva, facendo da gastronomía da zona un motor económico, ao mesmo tempo que tamén se lle proporcionan aos produtores locais unhas ferramentas coas que colaborar na venda directa, levando os alimentos da aldea á mesa dos potenciais clientes.

Deste xeito, o grupo Gayas busca unha dobre meta. Por unha banda poñer en valor os recursos do territorio (tamén os turísticos) e amosar que existe un rural con posibilidades, buscando que se produza un retorno económico digno e xusto para os nosos produtores e produtoras.

Impulsar un turismo de calidade

Pero a implicación do Xeodestino vai máis alá, xa que existe outra vertente coa que se persegue lograr un impulso turístico. Ademais de achegar os produtos da Montaña a toda a Península Ibérica, búscase que estas persoas que apostan por consumir alimentos de calidade e de quilómetro 0 se animen tamén a coñecer o propio territorio onde se producen.